Belgísk prinsessa handtekin á loftslagsmótmælum í London

Lafði Moncada, Prinsessan María-Esmeralda, yngsta dóttir Leópolds III belgíukonungs, systir Alberts II. konungs og föðursystir núverandi konungs Belgíu, Filippusar var handtekin á loftslagsmótmælunum sem staðið hafa yfir í London. Sky News greinir frá.

Yfir 1200 manns hafa verið handteknir af lögreglu í Extinction Rebellion mótmælunum sem staðið hafa yfir í sex daga í röð. Einnig hefur reglulega verið mótmælt fyrr á árinu.

Camden-hluti Extinction Rebellion samtakanna greindi frá handtöku prinsessunnar á Twitter síðu sinni. Sást þar lausnarbréf hennar og tekið fram að rannsókn sé í gangi á brotum hennar.

pic.twitter.com/T1gbIslVhO

— Extinction Rebellion Camden (@XRCamden) October 12, 2019

Esmeralda er búsett í London og hefur hún þar starfað við blaðamennsku, ritstörf og heimildamyndagerð. Þá er hún þekkt fyrir að berjast fyrir náttúrunni og réttindum kvenna og frumbyggja víða um heim.