Hópmynd í tilefni 30 ára afmælis FM957

Ein vinsælasta útvarpsstöð landsins, FM957, fagnar í dag 30 ára afmæli. Af því tilefni var boðað til myndatöku þar sem eins margir fyrrverandi og núverandi útvarpsmenn stöðvarinnar og gátu komið mættu.

Um er að ræða einkar glæsilegan hóp sem hefur fylgt landsmönnum síðustu þrjátíu ár í þáttum eins og Tveir með öllu, Zúúber, Tívolí, Brennslunni, FM95BLÖ, Íslenska listanum, Magasín, Villta vestrinu, Þrjár í fötu, Svala og félögum, Rólegt og rómantískt ásamt mörgum öðrum, auk þeirra sem sátu einir við hljóðnemann.

Sjá einnig: Núverandi og fyrrverandi starfsmenn FM957 fögnuðu saman

Á myndinni eru komnir margir af ástsælustu útvarpsmönnum síðustu 30 ára. Þar má nefna Steinda Jr. Völu Eiríks, Ósk Gunnars, Hvata, Auðunn Blöndal, Kristínu Ruth, Jón Axel, Ólaf Ásgeir, Egil Einarsson, Hjörvar Hafliðason, Rikka G, Kjartan Atla, Huldu Bjarna, Sverri Bergmann, Rúnar Róberts, Daníel Inga, Einar Ágúst, Ívar Guðmunds.

Þegar hér er komið við sögu mætti halda að listinn yfir frábæra útvarpsmenn væri búinn en svo er aldeilis ekki því hér eru einnig:

Steingrímur Snævarr, Erna Hrönn, Kiddi Ólafs, Bjarki Sig, Kristján Ingi, Elías Ingi, Samúel Bjarki, Biggi Nílsen, Kalli Lú, Ragnar Már, Bragi Guðmunds, Anna Björk, Þröstur, Halli Kristins, Þórhallur Þórhallsson, Brynjar Már, Heiðar Austmann og Ásgeir Kolbeins.

Kristín Ruth Jónsdóttir á FM957 segir ýmsa lykilmenn hafa verið fjarri góðu gamni en allir látið sjá sig sem höfðu tök á að mæta.

„Þetta byrjaði þannig að við sendum út á nýja og gamla starfsmenn og þá sem hafa unnið við dagskrárgerð í gegnum árin að við værum 30 ára í ár og langaði að gera hópmynd af öllu starfsfólki FM957,“ segir Kristín.

Hún bætir við að hópurinn sé glæsilegur og þakkar hlustendum stöðvarinnar fyrir að hafa verið með öll þessi ár, frá 13. júní 1989.