Helgi Magnússon kaupir helminginn í Fréttablaðinu

Helgi Magnússon athafnamaður hefur samkvæmt heimildum Vísis fest kaup á helmingi hlutafjár í Torgi ehf., eignarhaldsfyrirtæki Fréttablaðsins. Ekki liggur fyrir hvert kaupverðið er.

Á dögunum var óvænt gengið frá ráðningu Davíðs Stefánssonar í ritstjórastól, en Davíð hefur lítil sem engin afskipti haft af fjölmiðlun eða blaðamennsku ef undan er skilin þáttagerð á sjónvarpsstöðinni Hringbraut.

Voru uppi vangaveltur um hvort sú ráðning tengdist breytingum á eignarhaldi blaðsins, sem hefur um árabil verið mest lesni prentmiðill landsins. Vísir hefur í dag og í gær reynt að ná tali af Helga. Hann var upptekinn á fundi í gær þegar fréttastofa náði af honum tali en sagðist myndu hringja þegar fundi lyki. Ekkert varð af því.

Undir Torgi ehf. eru skráðir miðlarnir Fréttablaðið, frettabladid.is og Markaðurinn. Fyrirsvarsmaður er Kristín Þorsteinsdóttir, ritstjóri Fréttablaðsins ásamt Davíð er Ólöf Skaftadóttir, Hörður Ægisson er ritstjóri Markaðar og Sunna Karen Sigurþórsdóttir er ritstjóri frettabladid.is.

Fjölmiðlaáhugi blundað lengi með Helga

Á vef fjölmiðlanefndar eru félög í eigu Ingibjargar S. Pálmadóttur skráð fyrir um 80 prósent eign í Torgi, félag í eigu Sigurður Bollasonar fyrir rétt tæpum 9 prósentum.

Helgi hefur verið fyrirferðarmikill í íslensku viðskiptalífi. Hann hefur verið forstjóri Hörpu og Hörpu Sjafnar og undanfarin ár hluthafi og stjórnarmaður í Marel og Bláa lóninu, hvar hann gegnir formennsku.

Samkvæmt tilkynningu frá Torgi ehf. mun Helgi taka sæti í stjórn félagsins í framhaldinu og Ingibjörg Pálmadóttir tekur við stjórnarformennsku af Einari Þór Sverrissyni. Ingibjörg hefur gegnt starfi forstjóra síðustu ár.

Helgi fagnaði nýlega sjötugs afmæli sínu og nýlega kom út bókin „Lífið í lit“, endurminningar Helga sem Björn Jón Bragason skráði. Þar segir af miklum fjölmiðlaáhuga Helga allt frá skólaárum hans. Helgi velti því fyrir sér að leggja fyrir sig nám í blaðamennsku í Bandaríkjunum en viðskiptafræðin varð fyrir valinu. 

Var ritstjóri Frjálsrar verslunar

Blaðamennskudraumur Helga hefur þó ávallt blundað með honum og í „Lífinu í lit“ er allangur kafli sem greinir frá ritstjórnarferli hans á tímaritinu Frjáls verslun, en hann tók við starfi ritstjóra þar árið 1988 hvar hann fékk svalað blaðamennsku- og fjölmiðlaáhuga sínum.

„Á þessum tíma varð sú breyting í fjölmiðlum víða um heim að umfjöllun um stjórnmál fór minnkandi en á móti var kastljósinu beint að atvinnulífi og efnahagsmálum. Viðskiptafréttir urðu æ fyrirferðarmeiri. Þessi breyting var komin til að vera eins og menn þekkja. Rekstur Frjálsrar verslunar gekk vel og ég naut þessa starfs mjög. Þarna rættist gamall draumur, enda hafði minnstu munað að ég legði fyrir mig nám í blaðamennsku að loknu stúdentsprófi eins og áður var nefnt,“ eins og segir meðal annars í bókinni.

Helgi er þekktur fyrir að hafa blandast inn í hið örlagaríka Hafskipsmál, hvar hann var endurskoðandi og var handtekinn í tengslum við það mál, svo áfram sé vitnað í Lífið í lit. Helgi hefur haft nokkur afskipti af stjórnmálum, er einn af bakhjörlum Viðreisnar og ákafur stuðningsmaður Vals.