Frjálsi kominn í hóp stærstu hluthafa Arion

Frjálsi lífeyrissjóðurinn, sem kom fyrst inn í hluthafahóp Arion banka í hlutafjárútboði bankans síðasta sumar, hefur bætt við sig í bankanum og fer nú með 1,18 prósenta hlut í honum, samkvæmt nýjum lista yfir stærstu hluthafa hans.

Er eignarhlutur lífeyrissjóðsins metinn á liðlega 1,7 milljarða króna miðað við núverandi gengi hlutabréfa í bankanum.

Til viðbótar hafa Lífeyrissjóður starfsmanna ríkisins og Stapi lífeyrissjóður bætt lítillega við sig í Arion banka og fer sá fyrrnefndi nú með 2,0 prósenta hlut og sá síðarnefndi 1,2 prósenta hlut.

Eins og greint hefur verið frá í Fréttablaðinu seldi breski vogunarsjóðurinn Attestor Capital hátt í þriggja prósenta hlut í bankanum fyrir um fjóra milljarða króna í síðustu viku. Eftir söluna fer sjóðurinn, sem kom fyrst inn í hluthafahóp Arion banka í mars árið 2017, með um 2,9 prósenta hlut í bankanum.