Ágúst hættir sem forstjóri Tempo

Gary Jackson tekur í dag við stöðu forstjóra í hugbúnaðarfyrirtækinu Tempo ehf, dótturfélagi Origo hf.

Í tilkynningu síðarnefnda félagsins til Kauphallarinnar segir að fráfarandi forstjóri Tempo, Ágúst Einarsson, hafi ákveðið að „gefa ekki kost á sér í næsta áfanga í uppbyggingu Tempo, sem verður með áherslu á starfsemi í Bandaríkjunum.“ Því muni hann hætta sem forstjóri en verði eftirmanni sínum innan handar næstu mánuði.

Eftirmaðurinn, fyrrnefndur Gary Jackson, er sagður hafa 25 ára reynslu sem „leiðtogi hjá hugbúnaðarfyrirtækjum, með sérstaka áherslu á gerð hugbúnaðarlausna sem stuðla að aukinni framleiðni fyrirtækja.“ Nánari upplýsingar um nýjan forstjóra Tempo má finna með því að smella hér.

Tempo er í 55% eigu Diversis Capital og 45% eigu Origo.