Viltu finna sólina í vetur?

Nú þegar einn lengsti mánuður ársins er genginn í garð eru væntanlega margir sem sakna hlýju, birtu og sólar. Vetrarfrí styttir biðina til sumarsins og það eru allmargir staðir að velja um.

Flestir Íslendingar fara til Tenerife eða Gran Kanarí yfir vetrartímann. Þar er eiginlega alltaf sól og gott veður. Þótt Tenerife sé langvinsælasti staðurinn af Kanaríeyjunum þá væri alveg gaman að prófa nýjan stað. Hvað með Lanzarote eða Fuerteventura? Eða dvelja í borg á þessum eyjum, Las Palmas á Gran Kanarí eða Santa Cruz á Tenerife? Í janúar er meðalhiti í þessum borgum 17 stig en heit sólin eykur hitann enn frekar. Það er þægilegt veðurfar til gönguferða og útiveru. Það tekur um það bil fimm og hálfa klukkustund að fljúga til Kanaríeyja frá Íslandi.

Það má vel nefna Máritíus sem er gríðarlega falleg eyja ekki langt frá Madagaskar. Eyjan er í Indlandshafi úti fyrir suðausturströnd Afríku. Grænhöfðaeyjar eru líka spennandi kostur fyrir þá sem vilja fara á nýjan stað og njóta sólar.

Margt spennandi í boði

Flórída er annar kostur. Þar er hlýtt og notalegt. Meðalhitinn í Miami í desember er 20,6 gráður en algengur hiti er 24,8 gráður. Það er hægt að velja um marga frábæra staði á Flórída til að heimsækja. Orlando þar sem hinn vinsæli ævintýragarður Disney World er. Margir fara til Tampa, St. Petersborg eða Fort Lauderdale. Þægilegast er að hafa bíl til umráða í Flórída. Það er rúmlega átta stunda flug til Flórída.

Ástralía er sömuleiðis kostur. Þar er sumar og sól en sumarmánuðir eru frá desember til febrúar. Meðalhiti getur farið upp í 25 gráður og jafnvel meira í janúar. Þann 26. janúar er þjóðhátíðardagur Ástrala og mikið um að vera alls staðar. Sydney hefur upp á margt skemmtilegt að bjóða. Ekki er beint flug frá borgum í Evrópu til Sydney en hægt að millilenda í Singapore sem er reyndar ákaflega skemmtileg borg að heimsækja.

Taíland eða Víetnam

Hvernig væri að finna sólina í Taílandi? Það er reyndar uppáhaldsstaður margra Íslendinga sem fara þangað ár eftir ár þrátt fyrir langt flug. Það er þurrkatímabil í Taílandi frá desember fram í apríl. Fallegar strendur draga marga til sín og í Taílandi er afar góður matur. Phuket-eyja er ákaflega vinsæll staður að heimsækja. Phuket er stærsta eyja Taílands og býður upp á gríðarlega fallegar strendur og stórbrotið umhverfi. Jafnframt er upplifun að koma til Bangkok en þangað er tæplega tíu klukkustunda flug frá til dæmis Helsinki.

Víetnam er áhugaverður kostur. Þar liggur mikil saga og áhugavert að hlusta á þarlenda fararstjóra segja frá sinni hlið á sögunni. Meðalaldur í Víetnam er ekki hár þar sem stór hluti þjóðarinnar féll í stríðinu. Enn eru margir akrar í Víetnam eitraðir eftir þennan hörmulega tíma. Margt framandi er að sjá í Víetnam. Ha Long-flói er ótrúlegur staður og einstaklega áhugavert að sigla þar um á milli fallegra kletta. Ha Long-flói hefur komið við sögu í mörgum bíómyndum, meðal annars James Bond. Ha Long er ekki langt frá Hanoí.

Um Karíbahafið

Karíbahafið er vissulega áhugavert. Þar eru margar fallegar eyjar til að heimsækja yfir vetrartímann. Barbados eða Bahamaeyjar. Eða heimsækja nokkrar eyjar í einni ferð með skemmtiferðaskipi. Þá er að vísu stutt stopp á hverjum stað. Mexíkó gæti líka verið ákaflega spennandi áfangastaður.

Margir staðir koma til greina yfir vetrartímann þar sem sólina er að finna. Allt eftir því hvað fólk vill eyða miklum peningum í ferðina eða hverju það er að sækjast eftir. Brasilía væri örugglega áhugaverður staður fyrir marga á meðan aðrir kjósa að fara alltaf á sama staðinn, til dæmis Tenerife.

Ef maður er ekki að hugsa um sólina þá er hægt að skreppa í borgarferð og gera góð kaup á útsölum í janúar. Ofarlega á lista eru Barcelona, Berlín, Kaupmannahöfn, París, London, New York eða Boston. Það er kalt í mörgum þessara borga yfir vetrartímann og þess vegna nauðsynlegt að klæða sig vel sé haldið þangað.