Ákvörðun um gæsluvarðhald yfir fólkinu frestað til kvölds

Karl og kona, sem handtekin voru í gær vegna eldsvoðans við Kirkjuveg á Selfossi, voru leidd fyrir dómara í Héraðsdómi Suðurlands á fjórða tímanum í dag. Lögregla hefur farið fram á vikulangt gæsluvarðhald yfir fólkinu á grundvelli rannsóknarhagsmuna en dómari tók sér frest fram á kvöld til að úrskurða um kröfuna.

Lögregla telur rökstuddan grun um að eldsupptök hafi verið af mannavöldum. Karlinn er húsráðandi að Kirkjuvegi en konan var gestkomandi í húsinu þegar kviknaði í því í gær. Skýrslur voru teknar af þeim í dag en ekki var unnt að ræða við þau í gær sökum ástands þeirra.

Hin grunuðu hafa áður komið við sögu lögreglu. Tvö létust í eldsvoðanum í gær, karl og kona á fimmtugs- og sextugsaldri sem voru bæði gestkomandi í húsinu. Lík þeirra voru flutt af vettvangi í morgun til krufningar.