Vinnubann vegna skorts á fallvörnum

Vinnueftirlitið hefur, eftir eftirlitsheimsókn, bannað vinnu við niðurrif á verkpöllum á norðurhlið nýbyggingar að Álalind 14 í Kópavogi vegna skorts á fallvörnum.

Vinnueftirlitið hafði á mánudaginn síðasta samband við stjórnanda ÁF húss þegar starfsmenn áttu eftir að taka niður verkpalla af 6 hæðum.

Stjórnandinn sagðist ætla að ræða við verkstjóra og bæta öryggi starfsmanna. Í eftirlitsskýrslu segir þó að greinilegt væri að starfsmenn hefðu haldið áfram að taka niður palla án fallvarna í ljósi þess að aðeins þrjár hæðir voru með verkpalla þegar Vinnueftirlitið skoðaði aðstæður á ný.

Vinnueftirlitið hefur í ljósi þessa bannað niðurrif verkpalla þangað til búið er að tryggja öryggi starfsmanna með fallvörnum. Þá er farið fram á að stjórnendur geri áhættumat fyrir niðurrif á verkpöllum og skilgreini forvarnir gegn fallhættu.

Á vef Vinnueftirlitsins kemur fram að fallslysum hefur fjölgað síðustu ár hér á landi. Að því er fram kemur í frétt eftirlitsins hefur stofnunin þurft að banna vinnu sem unnin er í hæð nokkrum sinnum það sem af er sumri.