Opinn fyrir því að verða næsti „Bachelor“

Jason Tartick, sem tók þátt í raunveruleikaþættinum The Bachelorette og keppti um hylli Beccu Kufrin, er opinn fyrir því að verða piparsveinninn í næstu þáttaröð.

Mikil eftirvænting ríkir á meðal aðdáenda þáttanna sem bíða spenntir eftir því að þáttastjórnendur tilkynni hver verði næsti piparsveinn raunveruleikaþáttanna.

Tartick er bankamaður frá Buffalo en búsettur í Seattle í Bandaríkjunum. Hann var alveg handviss um að Becca Kufrin myndi velja sig en varð síðan sár og hissa þegar hún hætti með honum. Eftir standa þeir Garrett Yrigoyen og Blake Horstmann.

Í viðtali hjá Access segist Tartick vera mjög opinn fyrir hugmyndinni um að verða næsti piparsveinn þáttanna því það hafi staðist allar hans væntingar að taka þátt í The Bachelorette. Hann segist þó sjálfur ekki vera viss um að hann verði valinn því svo margir aðrir komi til greina.

Þegar Tartick hafði náð áttum eftir sambandsslitin heimsótti hann Beccu aftur til að kveðja hana almennilega, svo sómi væri að, því hann væri þakklátur fyrir hana og tengslin sem þau hefðu myndað.

Hann segir að Becca sé frábær kona og vonast til þess að þau geti verið vinir áfram.