#kosningar17

Þvílík lýðræðisveisla í einu landi. Árlegar þingkosningar á morgun, reglulegar forsetakosningar og sveitarstjórnarkosningar rétt handan við áramótin. Þess á milli er nóg af netkosningum um hvaða göngustíg eigi að flikka uppá fyrir peninginn frá frúnni í bæjarstjórastólnum eða hvaða kór/söngvari/jólastjarna komist áfram í úrslitaþáttinn í Háskólabíó/Hörpu/Laugardalshöll.

Það er samt ekkert eins og að kjósa á kjördag á kjörstað. Það er svo notalegt að vera aðeins uppáklædd og nikka brosandi til nágrannanna, vitandi að við erum þarna í kjördeildinni til að Móta framtíðina saman (M). Við erum kannski ekki sammála um hvernig það verður best gert, en við Látum hjartað ráða för (S) og trúum því að við Gerum betur (V) í að búa til samfélag Fyrir okkur öll (D) með atkvæðinu okkar.

Hvort sem við Kjósum Sigurð Inga og Lilju til forystu (B) eða einhverja aðra frambjóðendur, þá erum við öll viss um að fólkið sem við erum að kjósa leggi til grundvallar mikilvæg gildi á borð við Réttlæti, sanngirni og lýðræði (T) alveg óháð því hvort það vill Vinstri velferð, hægri hagstjórn (C) eða einhverja aðra leið að betra samfélagi. Sjónarmið margra heyrast hvort sem þeir vilja Burt með fátækt og spillingu (F) eða leggja áherslu á önnur mál. Það er ekki víst að allir kjósendur muni telja niðurstöður kosninganna fela í sér að við Tökum stjórn saman (R), því sumir telja mikilvægt að við Tökum til (A) fyrst, en aðrir segja að Framtíðin okkar (P) sé núna.

Það er mikilvægt að njódda og livva, en líka að kjóssa. Megi #Kosningavakan verða góð og stjórnarmyndunarviðræður enn betri!

 

Höfundur er pistlahöfundur Fréttablaðsins.