Hættan á stríði á Kóreuskaga ekki meiri í rúm sextíu ár

Hætta á stríðsátökum á Kóreuskaga hefur ekki verið meiri frá því átökum lauk með vopnahléi fyrir rúmum sextíu árum. Miklar heræfingar hafa farið fram beggja vegna landamæra Kóreuríkjanna undanfarna daga og Bandaríkjamenn hafa sent þangað flugmóðurskip og eru að setja upp eldflaugavarnarkerfi sem Kínverjar telja að ógni þeim hernaðarlega.

Spennan á Kóreuskaga hefur sjaldan verið meiri en nú frá því að vopnahlé var samið í kóreustríðinu hinn 27 júlí árið 1953. Kim Jong Un einræðisherra Norður Kóreu hefur að undanförnu haldið áfram eldflaugatilraunum sínum og beinlínis hótað að skjóta kjarnorkusprengjum á bæði Suður Kóreu og borgir í Bandaríkjunum. 

Harry Harris æðsti hershöfðingi Bandaríkjamanna í Asíu minnti á það fyrir þingnefnd í dag að Norður Kórea væri eina ríkið sem gert hefði kjarnorkuvopnatilraunir á þessari öld.

Spennan magnast

„Með hverri tilraun færist Kim Jon Un nær því yfirlýsta markmiði sínu að geta gert fyrirvaralausar kjarnorkuárásir á bandarískar borgir og hann er ekki hræddur við að sér mistakist opinberlega. Að verja föðurland okkar hefur forgang hjá mér svo ég verð að gera ráð fyrir að yfirlýsingar Kims Jong séu réttar,“ sagði Harris.

Spennan magnast með hverri yfirlýsingunni sem gefin er beggja megin landamæra Kóreuríkjanna og herleikir þeirra auka enn á tortryggnina og óttann við að annar aðilinn verði fyrri til árásar. Þannig hafa Bandaríkjamenn sent flugmóðurskip og kjarnorkuknúinn kafbát að landhelgi Suður Kóreu og vinna nú að því að setja upp svo kallað THAAD eldflaugavarnarkerfi í landinu.

„Það verður tilbúið til notkunar á næstu dögum og þannig getum við betur varið Suður-Kóreu gegn vaxandi ógn frá Norður-Kóreu,“ sagði Harris.

Kínverjar áhyggjufullir

Kínverjar eru eina þjóðin sem heldur uppi einhverjum samskiptum við Norður Kóreu og eina þjóðin sem getur haft einhver áhrif á stjórnvöld þar. Þeir hafa miklar áhyggjur af vaxandi spennu á svæðinu því Kína gæti dregist inn í átök á Kóreuskaga. Til að minna á mátt sinn sýndi opinber fréttastofa Kína myndir í dag af fyrsta heimasmíðaða flugmóðurskipi landsins sem verður tilbúið til notkunar árið 2020.

Geng Shuang talsmaður kínverska utanríkisráðuneytisins ítrekaði áskorun til deiluaðila í dag um að slaka á spennunni.

„Við höfum tjáð Bandaríkjamönnum og Suður-Kóreumönnum að við höfum miklar áhyggjur af uppsetningu THAAD-eldflaugavarnarkerfisins og sagt að það muni raska hernaðarjafnvæginu í þessum heimshluta, ýfa ástandið enn frekar á Kóreuskaganum og það muni hvorki hjálpa til við kjarnorkuafvopnun á skaganum né viðhalda friðinum,“ sagði Shuang.

Kínverjar skoruðu því á aðila að láta af heræfingum og ögrunum í garð hvors annars en þeir telja líka að uppsetning THAAD eldflaugavarnarkerfisins ógni öryggishagsmunum þeirra.

„Kína hvetur Bandaríkjamenn og Suður-Kóreumenn eindregið til að hætta aðgerðum sem auka á spennuna í þessum heimshluta og skaða öryggishagsmuni Kína, og hætti við uppsetningu THAAD-kerfisins og fjarlægi búnaðinn. Kína mun taka nauðsynleg skref til að verja hagsmuni sína,“ sagði talsmaður kínverska utanríkisráðuneytisins.