Tafir vegna aukinnar aðstoðar við fatlað fólk: „Ríkið hefur ekki klárað málið.“

Síðustu vikuna hefur fréttastofa flutt fréttir af fötluðu fólki sem þarf mikla aðstoð í daglegu lífi en fær hana ekki. Kona sem situr föst á spítala vegna þess að hún fær ekki aðstoð við hæfi og ungur maður sem fær aðeins aðstoð hálfan mánuð segja að NPA samningur myndi breyta lífi þeirra.

Sjá einnig: Hefur beðið í fimm ár eftir notendastýrðri persónulegri aðstoð



NPA samningar eru persónumiðuð aðstoð þar sem notendur geta sniðið aðstoðina eftir sínum þörfum. Nýlega kom út skýrsla um NPA-samninga sem sýnir mjög góðan ár­ang­ur verk­efn­is en þar var meðal annars hagkvæmni og nýtni aðstoðar rannsökuð sem og ánægja með þjónustuna.  

Fyrir fimm árum samþykktu stjórnvöld að bjóða fimmtíu manns NPA aðstoð til tilraunar. Notendur áttu að vera orðnir 150 í ár en engir nýir samningar hafa verið gerðir.

Eygló Harðardóttir sagði í óundirbúnum fyrirspurnartíma á Alþingi í vikunni að sveitarstjórnir landsins hafi tafið málið en NPA samningar eru samstarfsverkefni ríkis og sveitarfélaga.

Halldór Halldórsson, formaður Sambands íslenskra sveitarfélaga, segir aftur á móti tafir skrifast á ríkið.



„Ríkið hefur ekki klárað málið. Það er áhugi á lagasetningu en við viljum að fjármagn fylgi lagasetningu svo það sé hægt að reka þetta verkefni sómasamlega.“

 

Halldór segir vilja hjá sveitarfélögum að reka NPA-verkfnið enda málefni fatlaðra á þeirra borði. En til að lögbinda verkefnið þurfi að setja mun meira fjármagn í það en sett var í tilraunaverkefnið.



„Það eru viðræður í gangi og þetta er á einhverju stigi núna án þess að ég geti tjáð mig sérstaklega um það, en fram til þessa hefur þetta verið ströggl um fjármagn,“ segir Halldór.