Jón Ragnar sækist eftir 3. sæti

Jón Ragnar Ríkharðsson, sjómaður og formaður Verkalýðsráðs Sjálfstæðisflokksins, sækist eftir 3. sæti í prófkjöri Sjálfstæðismanna í Reykjavík þann 3. september næstkomandi.

Í fréttatilkynningu frá Jóni Ragnari segir að hann hafi eingöngu unnið við líkamlega erfiðisvinnu í 35 ár, mest á sjó, en hann hefur verið háseti á Ásbirni RE 50 síðastliðin átta ár.

„Hann ólst upp í neðra Breiðholti í framkvæmdanefndarblokk og lifði við hefðbundin kjör íslenskrar verkamannastéttar. Styrkur Jóns Ragnars er að hann hefur alla tíð unnið erfiðisvinnu til sjós og lands - þekkir hvað það er að þurfa eingöngu að treysta á sjálfan sig.

Árið 2009 byrjaði Jón Ragnar að vera virkur í grasrótarstarfi Sjálfstæðisflokksins og hefur gengt ýmsum trúnarastörfum fyrir flokkinn - m.a. verið formaður verkalýðsráðs síðan 2012 og sem slíkur setið í miðstjórn.

Jón Ragnar mun leggja höfuðáherslu á málefni aldraðra því þau hafa setið á hakanum árum saman. Það er nauðsynlegt að eldri borgarar fái verðskuldaða viðurkenningu fyrir sín störf og eigi möguleika á að eiga áhyggjulaust ævikvöld.

Það er algerlega óásættanlegt að fólki sé refsað fyrir að verða sjötugt - en það er því miður staðreynd. Allir mannréttindasáttmálar vesturlanda banna mismunun á grundvelli litarháttar, kynferðis, kynhneigðar og kynvitundar auk þess sem ekki má láta fólk gjalda þjóðernis, trúar eða stjórnmálaskoðana.

Svo er það viðurkennt af stjórnvöldum að heilbrigt fólk á þessu ári skuli gjalda fyrir að hafa fæðst árið 1946 - þessu er mikilvægt að breyta viljum við kallast siðmenntuð þjóð.

Jón Ragnar er maður sem veit hvað hann vill og mun berjast af alefli fyrir sínum hugsjónum,“ segir í tilkynningunni.