Sveinn Óskar býður sig fram í 3.-4. sæti

Sveinn Óskar Sigurðsson, framkvæmdastjóri og talsmaður FGMOS, fulltrúaráðs grunnskólaforeldra í Mosfellsbæ, býður sig fram í 3.-4. sæti í prófkjöri Sjálfstæðisflokkins í Suðvesturkjördæmi.

Sveinn Óskar hefur um árabil starfað innan Sjálfstæðisflokkins og meðal annars gegnt stöðu formanns Fjölnis FUS í Rangárvallasýslu, setið í stjórn SUS um árabil fyrir Suðurkjördæmi, í stjórn og sem formaður Sjálfstæðisfélags Mosfellinga í Mosfellsbæ.

„Sveinn hefur átt sæti í umhverfisnefnd Mosfellsbæjar fyrir Sjálfstæðisflokkinn. Sveinn hefur ritað greinar í Morgunblaðið í yfir 2 áratugi, ritaði ljóð í Lesbók Morgunblaðsins þegar það ágæta blað var gefið út og gaf út eina ljóðabók árið 1992. Sveinn er fastur penni á Eyjunni og hefur ávallt látið til sín taka um margvísleg málefni. Sveinn ætlar sér að slá nýjan tón innan vébanda Sjálfstæðisflokksins og á Alþingi Íslendinga fái hann til þess brautargengi hjá flokksfélögum sínum og kjósendum í Suðvesturkjördæmi,“ segir í tilkynningu frá Sveini Óskari.

Hann er 48 ára, með BA gráðu í heimspeki og hagfræði, MBA gráðu og MSc meistaragráðu í fjármálum fyrirtækja.

„Helstu áherslur Sveins eru fjölskyldumál, skólamál, málefni aldraða og öryrkja. Sveinn leggur áherslu á að efla gömul fyrirheit Sjálfstæðisflokksins „stétt með stétt“ og leggur áherslu á að tryggja beri hagsmuni barnafólks, húsnæðismál ungs fólks og leggja höfuðáherslu á fjármál aldraða sem tryggja á að allir sem komnir eru á efri ár geti haldið reisn sinni og nýtt starfskrafta sína og elju án þess að trygginabætur og lífeyrir skerðist. Stuðla ber að því að tryggja stöðugleika í efnahagsmálum og vill Sveinn Óskar sjá kerfisbreytingar í lánamálum sem stuðli að því að vaxtastig í landinu lækki til langframa. Byggja þarf upp tryggar stoðir til að taka við auknum ferðamönnum til landsins og stuðla að því að skatttekur þeirrar greinar berist í innviði á Íslandi. Sveinn Óskar leggur áherslu á að nýta einkaframtakið til að takast á við biðraðavanda víða í samfélaginu, efla heilbrigðisþjónustu í landinu og tryggja umönnun allra landsmanna enda mannréttindi að fólk geti haldið lífsgæðum sínum út alla ævina,“ segir í tilkynningunni frá Sveini Óskari.