Gary Neville hræðist það ekki að missa starfið

Gary Neville, knattspyrnustjóri Valencia, segist vera í öruggu starfi hjá félaginu en hann hefur farið skelfilega af stað sem stjóri liðsins.

Neville býður enn eftir fyrsta sigurleiknum með félaginu en liðið mætir Espanyol í spænsku deildinni í dag. Spænskir fjölmiðlar vilja meina að það sé farið að hitna verulega undir stjóranum hjá Valencia en hann þvertekur fyrir slíkt tal.

„Fyrir mitt leyti eru margir leikir eftir, en við tökum bara einn leik í einu,“ sagði Neville á blaðamannafundi.

„Við erum ekki að fara á taugum og trúum enn á mannskapinn. Leikmenn trúa á sjálfan sig og ég tel að hlutirnir séu að fara snúast í rétta átt. Við þurfum aftur á móti nauðsynlega á sigri að halda í leiknum gegn Espanyol.“