Hlynur stigahæstur í stórsigri Drekanna

Hlynur Bæringsson, landsliðsfyrirliði í körfubolta, og félagar hans í liði Sundsvall Dragons unnu stórsigur á útivelli gegn Malbas, 85-60, í sænsku úrvalsdeildinni í kvöld.

Drekarnir voru tíu stigum yfir í hálfleik, 46-36, og juku jafnt og þétt við forskot sitt í seinni hálfleik. Þeir gengu endanlega frá leiknum í fjórða leikluta sem þeir unnu, 20-6.

Hlynur átti stórleik og var stigahæstur sinna manna með 21 stig auk þess sem hann tók tíu fráköst og gaf þrjár stoðsendingar.

Með sigrinum komst Sundsvall upp að hlið Jakobs Sigurðarsonar og félaga í Borås en bæði lið eru með 24 stig eftir 19 leiki.