Notaði Suárez hendina? | Sjáðu mörkin úr leikjum Barcelona og Manchester United

Luis Suárez skoraði fyrra mark Barcelona gegn LA Galaxy þegar hann stýrði boltanum í netið af stuttu færi en einhverjir leikmenn LA Galaxy voru ósáttir og gáfu til kynna að hann hefði notað hendina til þess að leggja fyrir sig boltann.

Dæmi hver fyrir sig en Suárez var tekinn af velli í hálfleik en Barcelona hafði betur í leiknum 2-1. Bætti Sergi Roberto við marki í seinni hálfleik en Tommy Meyer náði að klóra í bakkann undir lok leiksins.

Í San Jose vann Manchester United öruggan sigur á San Jose Earthquakes en Juan Mata, Memphis Depay og Andreas Pereira sáu um markaskorunina fyrir þá rauðklæddu. Fatai Alashe minnkaði muninn fyrir San Jose í stöðunni 0-2 en lengra komust þeir ekki.

Barcelona og Manchester United mætast síðan á laugardaginn á Levi's Stadium, heimavelli San Fransisco 49ers en leikurinn verður í beinni útsendingu á Stöð 2 Sport og Stöð 2 Sport HD og verður flautað til leiks klukkan 20.00.