Íslenskur leiðsögumaður: „Sumir hlusta bara ekki“

Svo virðist sem erlendir ljósmyndarar hunsi aðvaranir reyndra íslenskra leiðsögumanna hér á landi í leit að hinni fullkomnu mynd. Breskur ljósmyndari lét viðvaranir leiðsögumanns sem vind um eyru þjóta í fjörunni fyrir neðan Jökulsárlón í gær.

„Sumir hlusta bara ekki,“ segir Ingólfur Bruun margreyndur leiðsögumaður, í samtali við Vísi. Ingólfur, sem einnig er ljósmyndari, fór fyrir hópi svissneskra ljósmyndara á vegum Extreme Iceland sem var staddur við lónið í fallegu veðri í gær að taka myndir. Í öðrum hópi var breskur ljósmyndari sem óð út í fjöruna þrátt fyrir áminningar um að gera það ekki.

„Hann var í vöðlum og þóttist bara nokkuð góður. Var alvanur að taka myndir í flæðarmálinu heima í Bretlandi,“ skrifaði Ingólfur í Facebook-færslu í hópnum Bakland Ferðaþjónustunnar. Hann telur mikilvægt að deila reynslusögum sem þessum með kollegum sínum til að allir séu meðvitaðir um fylgifiska aukins ferðamannafjölda hér á landi.

Sjá einnig:Fífldjarfur ferðamaður í Reynisfjöru

Ingólfur segist hafa rætt við leiðsögumann Bretans sem einnig var íslenskur. Sá sagðist hafa varað alla í hópnum við að fara út í fjöru en þessi eini hefði ekki hlustað. Ingólfur öskraði á Bretann sem stóð úti í sjónum en sneri að endingu aftur í land. Ljóst er að vöðlurnar hefðu ekki komið að neinum notum hefði alda tekið manninn. Hann slapp hins vegar og sömuleiðis búnaður hans. Það gilti þó ekki um alla.

Ingólfur útskýrir að þrátt fyrir að hafa brýnt fyrir sínum hóp að allir ættu að halda sig frá öldunum hefði einum tekist að láta öldurnar sækja sig og búnaðinn. Sá var þó heppinn og missti aðeins Canon G15 myndavél.

„Og smá stolt,“ segir Ingólfur. Í fyrra hafi ljósmyndari í hans hóp orðið fyrir tveggja milljóna króna tjóni þegar búnaður hans fór út í saltan sjóinn.

Sjá einnig:Eftirlitlaus börn á ísnum

Hann minnir líka á að hættan sé ekki aðeins bundin við sjóinn og öldurnar heldur einnig ísinn. Klakinn sé af öllum stærðum og gerðum. Með slagkrafti geti minnstu klakastykki ýtt vel við fólki.

Ingólfur og félagar halda kyrru innandyra á Hala í Suðursveit í dag. Ingólfur hélt í morgun í Jökulsárlón þar sem planið hafði verið að verja deginum við myndatöku þar en veður var svo vont að ákveðið var að snúa aftur að Hala. Hann varð var við útlendinga á húsbílum við lónið en ljóst var að illa gæti varið sökum veðurs á þannig bílum.

Því ráðlagði hann útlendingunum að skilja húsbílana eftir í vari við ferðaþjónustuhúsið við Jökulsárlón og fá far með bílalest sem Ingólfur tilheyrði að Hala.

„Það var bara glórulaust að hreyfa húsbílana,“ segir Ingólfur sem ók aftastur í bílalest nokkurra bíla úr lóninu og að Hala.

Uppfært klukkan 19:30

Í fyrri útgáfu stóð að Ingólfur og hans fólk hefði verið á húsbílum. Það hefur verið leiðrétt í fréttinni að ofan.