Ráðist á stærstu olíuhreinsunarstöð Íraks

Hersveitir íslamistasamtakanna ISIS réðust í nótt á olíuhreinsunarstöðina í Baiji, sem er um 210 km norður af Bagdad og ráða samtökin nú yfir um þremur fjórðu hlutum stöðvarinnar. BBC greinir frá.

Í Baiji fer fram um fjórðungur allrar olíuhreinsunar í Írak og fer öll olían sem þaðan kemur í framleiðslu á olíuvörum til innlendra nota, svo sem bensíni, matreiðsluolíum og eldsneyti á rafmagnsstöðvar. Atburðirnir í nótt gætu því aukið líkurnar á bensínskorti og rafmagnsleysi í Írak og aukið enn á upplausnina í landinu.

Þá hafa einnig verið átök milli hersveita ISIS og stjórnarhersins í Írak í vesturhluta landsins, þar sem uppreisnarmenn hafa borgina Ramadi á sínu valdi.