Vilanova: Fabregas vill vera áfram

Tito Vilanova, stjóri Barcelona, hélt því fram á blaðamannafundi í dag að Cesc Fabregas hafi ekki áhuga á að fara til Manchester United.

United gerði í gær 30 milljóna evra tilboð í Fabregas en fullyrt hefur verið í enskum miðlum að leikmaðurinn sé opinn fyrir því að fara ef Barcelona sé samþykkt því að selja hann.

Hann kom til Barcelona frá Arsenal fyrir tveimur árum síðan en ekki náð að festa sig í sessi í byrjunarliði félagsins á þeim tíma.

„Það hafa komið inn tilboð í hann frá öðrum félögum en ég ræddi við Cesc og hann fullvissaði mig um að hann vildi vera hér áfram. Ég hef því engar áhyggjur,“ sagði Vilanova.

„Hann vill ekki fara annað til að fá meiri pening eða spila meira. Hann veit að það er samkeppni um stöður hjá okkur en það er hans ákvörðun að vera hér.“