Tvö rauð er Real komst áfram

Fabio Coentrao og Angel Di Maria fengu báðir að líta rauða spjaldið þegar að Real Madrid gerði 1-1 jafntefli við Valencia í spænsku bikarkeppninni í kvöld.

Real vann þó fyrri leikinn á heimavelli, 2-0, og komst því áfram í undanúrslit keppninnar. Liðið mætir þar annað hvort Barcelona eða Malaga sem eigast við annað kvöld.

Þetta var þriðji leikur Real og Valencia á aðeins átta dögum en Real vann viðureign liðanna í deildinni um helgina, 5-0.

Iker Casillas, markvörður Real, fór meiddur af velli í fyrri hálfleik en Karim Benzema kom Real yfir í lok hans. Coentrao fékk svo að líta sitt annað gula spjald í upphafi síðari hálfleiks, fyrir að handleika knöttinn.

Tino Costa skoraði úr aukaspyrnunni fyrir Valencia en þar við sat, þó svo að Di Maria hafi einnig fengið rauða spjaldið seint í leiknum.