Strax byrjaðir á nýrri plötu

„Við gerðum 34 lög í vetur og völdum ellefu þar úr og settum á diskinn," segir Halldór Gunnar Pálsson, Fjallabróðir með meiru, um diskinn Föstudagslögin sem hann og Sverrir Bergmann gáfu út síðastliðinn föstudag.

Þeir Halldór og Sverrir hafa séð um liðinn Föstudagslögin í þáttum Auðuns Blöndal, FM95BLÖ, á útvarpsstöðinni FM957 í vetur. Þar fluttu þeir vikulega eitt þekkt lag sem þeir höfðu fært yfir í kassagítarsútgáfu. Halldór Gunnar sér um undirspilið í öllum lögunum og Sverrir syngur. „Ég vil nú meina að Sverrir geti vel spilað undir og hann vill meina að ég geti vel sungið. Ég er samt ekkert að fara að gaula með jafn æðislegan söngvara og Sverri Bergmann við hliðina á mér.

Hann segist á móti ekki vilja spila á gítar við hliðina á mér, svo ætli það sé ekki fínt að halda þessu svona. Ég ætla að minnsta kosti ekki að syngja fyrr en hann tekur upp gítarinn," segir Halldór og hlær. Diskurinn er aðeins fáanlegur á stafrænu formi á Tonlist.is.

Kaupi menn alla plötuna fylgir henni Þjóðhátíðarlagið í ár, Þar sem hjartað slær, sem er einmitt samið af Halldóri Gunnari og flutt af Sverri og rokkkórnum Fjallabræðrum. Þeir Halldór og Sverrir ætla ekki að láta hér við sitja því þeir eru með aðra plötu í vinnslu sem er væntanleg með haustinu.

„Sú plata verður aðeins veigameiri en þessi. Við erum ekki búnir að ákveða endanlega hvað verður á henni en það verður einhver blanda af frumsömdu efni og lítið þekktum lögum sem við ætlum að íslenska," segir Halldór en öll platan verður á íslensku og hljómsveit mun annast undirspilið.

- trs