Lítill áhugi á amerískri útgáfu af Lisbeth Salander

Þrátt fyrir flotta dóma og mikla umfjöllun hafa aðdáendur Stiegs Larsson tekið amerísku útgáfunni af Körlum sem hata konur heldur fálega. Aðsóknin hefur verið dræm hérlendis.

Kvikmyndaver Sony hefur tilkynnt að það hafi enn í hyggju að gera myndir tvö og þrjú eftir bókum Stiegs Larsson í Millennium-þríleiknum svokallaða þrátt fyrir að fyrstu myndinni, Karlar sem hata konur, hafi ekki tekist að slá í gegn. Talsmaður Sony lýsti þessu yfir í samtali við Entertainment Weekly.

Þar kom jafnframt fram að Daniel Craig og Rooney Mara hefðu þegar samið um að leika tvíeykið Mikael Blomkvist og Lisbeth Salander í næstu tveimur myndum en ekki liggur fyrir hvort leikstjórinn David Fincher endurtaki leikinn. Hann hefur hins vegar þegar gefið það út að ef handritið að mynd númer tvö sé gott komi það sterklega til greina en ráðgert er að hún verði frumsýnd seint á næsta ári.

Karlar sem hata konur hefur „eingöngu" þénað sextíu milljónir dollara í miðasölu í Bandaríkjunum frá því að hún var frumsýnd 21. desember. Á heimsvísu hefur myndin halað inn 72 milljónum dollara. Myndin kostaði rúmlega níutíu milljónir dollara. Viðbrögð gagnrýnenda hafa hins vegar verið góð, rottentomatoes.com gefur myndinni 86 prósent og metacritic.com 71 af hundrað. Þá hefur Rooney Mara verið tilnefnd til Golden Globe-verðlaunanna fyrir frammistöðu sína sem Lisbeth Salander.

Sömu sögu er að segja af Íslandi því þar virðist ameríska útgáfan ekki ætla að hitta í mark þrátt fyrir að bækur Larsson hafi notið mikillavinsælda. Eftir tvær vikur í sýningu höfðu rúmlega 3.700 séð myndina en til samanburðar má nefna að tæplega nítján þúsund sáu sænsku útgáfuna á jafn löngu tímabili í lok september árið 2009.

freyrgigja@frettabladid.is