Mourinho blæs á sögusagnir um að hann sé að hætta

Jose Mourinho, þjálfari Real Madrid, hefur ekki undan að svara spurningum um framtíð sína. Fyrir helgi var talað um að hann yrði rekinn en nú er talað um að hann hætti hjá félaginu næsta sumar.

Portúgalinn blæs á þennan fréttaflutning sem hann segir vera fráleitan.

"Er ég að fara frá Real Madrid? Það er ekkert satt í þessum fréttum. Ég vil ekki tjá mig meira um þetta," sagði Mourinho.

"Þið verðið að spyrja forseta félagsins hvort hann sé ánægður með mín störf. Það eru engin vandamál. Ég þarf ekkert að ræða við ykkur um hvað ég ræði við forsetann."