Mourinho með betri árangur en Pep í fyrstu 100 leikjunum

José Mourinho, þjálfari Real Madrid, er þegar búinn að endurskrifa þjálfarasöguna á Spáni og státar nú af betra vinningshlutfalli en Pep Guardiola, þjálfari Barcelona, í fyrstu 100 leikjum sínum sem þjálfari.

Real Madrid hefur unnið 76 af fyrstu 99 leikjum sínum undir stjórn Mourinho. Guardiola var með 70 prósent vinningshlutfall í fyrstu 100 leikjum sínum sem var met er hann deildi með Miguel Munoz, hinum goðsagnakennda þjálfara Real Madrid á árum áður.

Guardiola státar þó af mun betri árangri í innbyrðisleikjum sínum við Mourinho en Mourinho hefur aðeins einu sinni haft betur í tíu leikjum gegn Guardiola.