ÓL í hættu hjá Þormóði: Hugsa það versta en býst við því besta

Ólympíudraumur júdókappans Þormóðs Árna Jónssonar er í uppnámi eftir að hann meiddist á hné. Hann gæti verið með slitið liðband og sé það raunin mun hann missa af Ólympíuleikunum í London í sumar.

"Ég var í æfingabúðum og það voru margir á gólfinu. Svo keyrðu einhverjir gaurar inn í hliðina á mér og féllu á hnéð. Þetta var ekki gott og ég sá þá aldrei koma," sagði Þormóður við Vísi í kvöld.

"Tveir læknar eru búnir að skoða mig og þeir telja ekki að liðbandið sé slitið. Það er samt ómögulegt að segja fyrr en búið er að mynda hnéð. Það verður gert á morgun eða um helgina."

Þetta er mikið áfall fyrir Þormóð sem átti að taka þátt í þremur mótum í þessum mánuði. Hann er með þáttökurétt á Ólympíuleikunum sem stendur en fjarvera hans á næstu mótum gætu sett strik í reikninginn.

"Ég reyni að hugsa ekki neikvætt og sem minnst um þessi meiðsli á meðan ég bíð eftir staðfestingu á eðli meiðslanna. Ég er ekki með mikla verki, er ekkert mikið bólginn en það þarf samt ekki að þýða neitt."

Ef liðbandið er slitið verður Þormóður frá í að minnsta kosti hálft ár en þó svo hann sé minna meiddur verður að teljast líklegt að hann þurfi að hvíla eitthvað.

"Auðvitað setur þetta strik í reikninginn en ég gæti hangið inni þó svo ég taki ekki þátt í fleiri mótum fram að ÓL. Þetta verður bara að koma í ljós en ég hugsa það versta en býst við því besta."