Benedikt bíður eftir símtali frá Hollywood

„Þetta er djobb fyrir íslenskan leikara, það er að segja ef það verður íslenskur útrásarvíkingur í þessari mynd eins og þeirri dönsku," segir Benedikt Erlingsson. Mitchell Hurwitz, skapari gamanþáttanna Arrested Development, hefur keypt endurgerðarréttinn að kvikmyndinni Direktören for det hele eftir Lars von Trier.

Hann hefur fengið stórkanónurnar Bryan Singer og Ron Howard í lið með sér og ætlar sjálfur að leikstýra bandarísku útgáfunni, samkvæmt kvikmyndavefsíðu Empire.

Benedikt og Friðrik Þór Friðriksson léku stórt hlutverk í dönsku myndinni; Friðrik var íslenskur útrásarvíkingur en Benedikt túlkurinn hans. „Þetta var burðarhlutverkið í myndinni og nú bíð ég bara eftir símtalinu frá þeim. Ekki nema þeir striki út hlutverk túlksins," segir Benedikt og viðurkennir að hann hafi aldrei heyrt þessa Hurwitz getið og þaðan af síður þáttanna hans þótt þeir hafi hlotið fjöldann allan af Emmy-verðlaunum og Golden Globe styttu.

Ekki liggur fyrir hvenær tökur á amerísku útgáfunni eiga að hefjast en Benedikt á ljúfar og sérkennilegar minningar frá samstarfinu við von Trier, sem er annálaður furðufugl.

„Myndin var öll tekin upp í sama húsnæðinu af því að þar var svo gott mötuneyti og svo var boðið upp á bjór og snafs í hádeginu. Hann vildi eiginlega helst að allir væru fullir, allavega leikkonurnar, og varð hálffúll þegar fólk vildi ekki drekka meira. Að öðru leyti var óskaplega þægilegt að vinna með honum."- fgg