iPad 3 í febrúar á næsta ári

Talið er að næsta kynslóð iPad spjaldtölvunnar komi út í febrúar á næsta ári.

Upphaflega var talið að iPad 3 kæmi út í mars eða júní á næsta ári en nú er ljóst að Apple mun flýta útgáfunni. Samkvæmt Richard Gardner, greinanda hjá Citigroup, er ástæðan fyrir þessu sú að Apple vill skáka öðrum spjaldtölvuframleiðendum. Með því að flýta framleiðslu og útgáfu iPad 3 mun Apple geta lækkað verðmiðann á iPad 2 og vonandi lokkað hugsanlega kaupendur frá öðrum ódýrum spjaldtölvum.

Talsvert hefur dregið úr vinsældum iPad 2 eftir að vefverslunarrisinn Amazon gaf út spjaldtölvu sína, Kindle Fire, en hún er mun ódýrari en spjaldtölva Apple.

Lítið er vitað um næstu kynslóð iPad. Orðrómur er um að skjáupplausn iPad 3 verði helmingi meiri en á fyrri kynslóð spjaldtölvunnar.