Apple fær einkaleyfi á tækninýjungum

Einkaleyfis barátta tölvurisans Apple heldur áfram en í vikunni náði fyrirtækið að tryggja einkarétt á þremur tækninýjungum.

Apple hefur verið afar iðið við að tryggja einkarétt á hugmyndum og tækniframförum. Um leið og hugmynd eða drög að nýjungum liggja fyrir er einkaleyfisumsókn gefin út.

Í vikunni gaf einkaleyfisskrifstofa Bandaríkjanna út þrjú ný leyfi til Apple. Hið fyrsta tekur til nýrrar tækni til að vernda bakhlið iPhone og iPad en glerhjúpur tækjanna er víðfrægur fyrir að brotna auðveldlega. Tæknin fellst í þunnum stalli sem blæs út þegar tækið fellur á jörðina. Hraðamælir tækisins nemur fallið svo að stallurinn þykknar og þéttir glerið svo að það brotni ekki.

Annað einkaleyfi Apple er á fjölnota hleðslutæki. Tækið er hannað til að hlaða mörg raftæki frá Apple í einu.

Þriðja og síðasta - og jafnframt hið dularfyllsta - er einkaleyfi á staðsetningarforriti sem Apple hefur þróað undanfarin ár. Líklegt þykir að forritið nýti upplýsingar úr umhverfi sínu og miðli þeim til notenda þjónustunnar.