Klám flæðir yfir Facebook

Ný veira herjar nú á Facebook notendur um allan heim sem lýsir sér þannig að á Facebook síðum fólks birtast klámmyndir af svæsnustu sort. Vandamálið hefur verið að gera vart við sig í meira mæli undanfarna daga og nú er svo komið að notendur eru orðnir vægast sagt pirraðir. Það sem verra er, þá virkar vírusinn á þann hátt að svo virðist sem vinur þinn eða vinkona á Facebook sé að „pósta“ myndunum þrátt fyrir að vera alsaklaus af slíkri hegðun.

Stjórnendur Facebook hafa í gegnum tíðina verið afar duglegir við að ritskoða þennan vinsæla samskiptavef en í þessu tilviki virðist ekkert geta stöðvað klámbylgjuna sem flæðir um vefinn.

Sumir hafa gert að því skóna að tölvuþrjótahópurinn Anonymous standi á bakvið klámið, en áður höfðu verið fluttar af því fregnir að hópurinn hafi ætlað sér að eyðileggja Facebook þann fimmta nóvember síðastliðinn. Sá orðrómur rættist þó ekki og enn er allt á huldu um hver stendur á bakvið klámbylgjuna á Facebook.

Eins og við var að búast hafa nokkrar Facebook síður verið stofnaðar, þar sem kláminu er mótmælt harðlega.