Benjamín Þór: Ég er fórnarlambið

Benjamín Þór Þorgrímsson, líkamsræktarþjálfari, segist vera fórnarlamb Kompás og lögð hafi verið fyrir hann gildra. ,,Ég tel mig vera fórnarlambið. Ragnar er bara píslarvottur og tálbeita þeirra til að gera spennandi þátt fyrir þjóðina," segir Benjamín. Spurður hvort að lögð hafi verið fyrir hann gildra segir Benjamín: ,,Já, það er bara þannig."

Í fréttaskýringaþættinum Kompás í kvöld var fjallað um duldan heim handrukkara á Íslandi og samskipti Benjamíns og Ragnars Ólafs Magnússonar, fyrrum veitingamanns. Við vinnslu þáttarins síðla sumars náðist á myndband þegar Benjamín réðist að Ragnari sem stundum er kenndur við veitingastaðinn Óliver.

Segir að myndbandið hafi verið klippt til

Benjamín segir Ragnar hafi átt frumkvæði af því að þeir hittust og að myndbandið sem sýnt var í þættinum í kvöld hafa verið klippt niður. ,,Það kemur ekki allt fram í myndbandinu. Málið er persónulegt á milli mín og Ragnars. Ég er að hitta hann þarna út af mér sjálfum því þessi maður hefur bara valdið mér ónæði og kveikt í bílnum mínum."

Benjamín viðurkennir að samskipti hans og Ragnars hafi gengið of langt. ,,Hinn venjulegi maður hefði rassskellt hann Ragga fyrir að hafa kveikt í bílnum sínum. Það þarf engan handrukkara til þess."

Krefur 365 um bætur

Benjamín hyggst krefja 365 miðla um skaðabætur vegna birtingu myndskeiðsins á þeim forsendum að hún feli í sér brot á friðhelgi einkalífs. ,,Hvað verðu næst ef þeir komast upp með þetta? Það er náttúrulega bara verið að búa til einhverja æsifrétt."

Hjálpar fólki

Aðspurður hvort hann hafi handrukkað fólk segir Benjamín: ,,Nei. Ég tel mig ekki vera handrukkara. Ég hef hjálpað fólki en ég hef ekki verið að handrukka. Ég hef ekki verið að kúga eða berja fólk í gegnum tíðina."

Spurður hvaða fólki hann hafi hjálpað og þá hvernig segir Benjamín að fólk lendi í ýmiskonar vandræðum. ,,Ég hef tekið að mér próbónó verkefni þegar tölvum af krökkum er stolið og fundið fyrir þau. Maður er ekki verri maður en það. Ég hef hjálpað fólki miklu meira heldur en að níðast á því. En þetta fær maður í staðinn. Við erum oft fljótari en löggan að finna hlutina."

Auglýsingabrella

Jóhannes Kr. Kristjánsson, ritstjóri Kompás, kærði í morgun til lögreglu líflátshótanir sem bárust honum í gærkvöldi í gegnum þriðja aðila. Hann telur hótanirnar tengjast birtingu myndanna í kvöld.

,,Þetta er bara auglýsingabrella og kjaftæði. Komandi á Bylgjuna í morgun og gera sig að fífli og segjast hafa orðið fyrir hótunum. Það er bara verið að selja æsifréttir því fólk þrífst á óförum annarra," segir Benjamín.

Heillaóskir

Benjamín kveðst hafa fengið mikil viðbrögð við þættinum og umræðunni í kringum hann. ,,Ég hef ekkert fengið nema heillaóskir frá ótrúlegasta fólki." Hvað framtíð sína sem einkaþjálfari hjá World Class segist Benjamín óttast að þátturinn hafi afleiðingar.