Bítlarnir brátt aðgengilegir á netinu

Tónlist Bítlanna ætti að verða aðgengileg á netinu á næsta ári eftir því sem Paul McCartney segir bandaríska tónlistarvefnum Billboard.com. Verk hljómsveitarinnar eru ein fárra sem hafa haldið tónlist sinni frá vefverslunum eins og iTunes og Napster. McCartney sagðist vera nokkuð viss um að breyting yrði á á næsta ári. Hann segir seinkun hafa orðið á samningagerð hlutaðeigandi aðila og áætlanir dregist. Bítillinn fyrrverandi segir að hluti sem þessa þurfi að vanda vel til. Hann vilji ekki að eitthvað jafn jákvætt snúist í höndunum á þeim; “og eftir þrjú ár eigi maður eftir að hugsa; "Guð minn góður, gerðum við þetta?”" Einungis eitt atriði eigi eftir að leysa svo þess sé ekki lengi að bíða að tónlistin komist á netið. Plötur bítilsins sáluga George Harrison voru gerðar aðgengilegar á vefnum í síðasta mánuði sem þýðir að sólótónlist fjórmenninganna er nú hægt að kaupa þar. Talið er að EMI hafi verið að því komið að gefa út vörulista með lögum Bítlanna í formi stafræns niðurhals. Þá náðist loks að leysa ágreining um vörumerki Bítlanna á milli útgáfufyrirtækis hljómsveitarinnar Apple Corps og tæknirisans Apple Inc.