Engin venjuleg mús

Microsoft kynnir til sögunnar tölvumús sem er ýmsum kostum búin. Microsoft hefur sent frá sér nýja tölvumús, svokallaða Wireless Notebook Presenter Mouse 8000, sem býr yfir ýmsum skemmtilegum notkunarmöguleikum og beðið hefur verið eftir með mikilli eftirvæntingu.

Músina, sem þykir einkar handhæg við kynningar, má nota til að fletta í gegnum glærur, til dæmis í PowerPoint frá Microsoft og öðrum kynningarforritum, og það úr tæplega tíu metra fjarlægð frá tölvunni. Hún er þar að auki með innbyggðan ljósbendil og blek á tölvutæku formi, sem má hvort tveggja nota til að undirstrika ákveðin atriði á kynningum.

Músina má líka nota á kynningum sem byggja á marg- miðlunartækni eða sem handhæga fjarstýringu heima við, þar sem undir henni er stjórnborð til að fletta ljós- myndum, spila kvikmyndir og tónlist og hækka og lækka hljóð í tölvunni.

Þá er hún búin 2,4 GHz blátannartækni, sem gerir það að verkum að hún virkar þráðlaust úr fyrrnefndri tíu metra fjarlægð, án nokkurra truflana.

Á músinni er ennfemur takki sem gerir henni kleift að komast fljótt að glærum og stækka upp ákveðin atriði á þeim. Síðast en ekki síst er á henni ljós, sem blikkar þegar hún er að verða rafmagnslaus.

Með hliðsjón af ofansögðu má velta fyrir sér hvort tölvumýs séu hugsanlegir arftakar farsíma, verði þær færar um enn fleiri aðgerðir í framtíðinni.