Mikil eftirspurn eftir Apple iPhone

Forstjóri AT&T símafyrirtækisins sagði í gær, við opnun ráðstefnunar CTIA Wireless í Bandaríkjunum að þeir hefðu fengið yfir eina milljón fyrirspurna frá viðskiptavinum sínum um Apple iPhone. Það er líklegt að önnur símafyrirtæki út um allan heim hafi fengið annað eins af fyrirspurnum um þennan síma.

iPhone á að fara í sölu í júnímánuði í Bandaríkjunum. Símafyrirtækið AT&T verður eina fyrirtækið sem má selja hann þar í landi og það lítur út fyrir að það verði auðvelt verk.

iPhone er í raun þrjú tæki, sameinuð í eitt: Sími, iPod og internet tæki. Sími til að tala í, iPod til að hlusta á tónlist og Internet tæki, sem samanstendur t.d af Internet vafra, kortaþjónustu frá Google og tölvupóstþjónustu. Þó er líklegt að við höfum ekki séð allt sem verður í boði.

iPhone er GSM sími sem hefur GPRS og EDGE gagnaflutningstengingu. Hann hefur þar að auki WiFi þráðlaust netkort, þannig að það er hægt að tengja hann við þráðlaus net, til dæmis heimavið og á kaffihúsum.

Það sem er byltingarkennt við iPhone er snertiskjárinn. Hingað til hafa snertiskjáir aðeins getað skynjað snertingu á einum stað, en snertiskjárinn á iPhone getur skynjað snertingu á mörgum stöðum. Þetta gerir það að verkum að notendaviðmótið á iPhone er byltingarkennt. Til dæmis nægir að strjúka tveim puttum í átt til hvors annars til að smækka mynd á skjánum og til baka til að stækka myndina. Til að fletta í gegnum símaskrána er nóg að nota einn putta og strjúka skjánum, í þá átt sem á að fletta. Til að fletta í gegnum tónlistina í iPod hlutanum er flett á sama hátt í gegnum myndir af plötuumslögum og þeim snúið við til að velja lagið sem á að spila.

Búist er við að iPhone komi á markaðinn í Evrópu einhverntímann í október, nóvember eða desember á þessu ári. Ef þessi tímasetning stenst, er möguleiki að græjuóðir Íslendingar fái mjög spennandi jólapakka í ár.