Kertasalat Ragga Kjartans

Í næsta þætti af Mat og lífsstíl heimsækir Vala Matt myndlistarhjónin Ragnar Kjartansson og Ásdísi Sif Gunnarsdóttur.

„Þau eru að slá í gegn út um allan heim með frumlegum listaverkum sínum og gjörningum, og það má eiginlega segja að heimsóknin til þeirra hafi verið hálfgerður gjörningur,“ sagði Vala og hló.

„Þau bjuggu til mjög skemmtilegan bröns fyrir okkur. Raggi bjó til rétt sem hann lærði í Húsmæðraskólanum, en hann var fyrsti karlmaðurinn sem lærði við þann skóla. Það er náttúrulega ótrúlega skemmtilegt – og líkt honum,“ sagði Vala.

Kertasalatið úr Húsmæðraskólanum var afar skemmtilegt, að sögn Völu. „Svo kom það líka dálítið á óvart að þessi blanda var bara alveg glettilega góð,“ sagði hún og hló við.

Kertasalat

Salatblöð

Ananashringir

Bananar

Majónes

Kirsuber



Eitt salatblað er sett á hvern disk, og ananashringur lagður ofan á. Hálfum banana stungið í gatið og skorið aðeins ofan af honum. Majónesklípa sett ofan á bananann og kórónað með kirsuberi.