Talsmaður neytenda leggst gegn því að OV og Rarik fari undir Landsvirkjun

Talsmaður neytenda leggst gegn því að eignarhlutur ríkisins í Orkubúi Vestfjarða og Rafmagnsveitu ríkisins verði fluttur undir Landsvirkjun eins og gert er ráð fyrir í frumvarpi sem nú er til umfjöllunar á Alþingi. Þetta kemur fram í umsögn hans til iðnaðarnefndar vegna málsins.

Þar kemur einnig fram að talsmaður neytenda taki undir þær tillögur sem fram komi í tengdu frumvarpi að fjármálaráðherra fari í stað iðnaðarráðherra framvegis með eignarhlut ríkisins í Hitaveitu Suðurnesja, Orkubúi Vestfjarða, Rafmagnsveitum ríkisins og Landsvirkjun.

Hins vegar telji hann hugmyndir um flutning Orkbúsins og Rarik undir Landsvirkun óheppilegar þar sem þær dragi úr tækifærum á að auka virka samkeppni á sem flestum stigum raforkumarkaðar neytendum til hagsbóta. „Þó að talsmaður neytenda tjái sig almennt ekki um eignarhald fyrirtækja á markaði dregur þessi ráðstöfun úr möguleikum á að dreifa eignarhaldi síðar með það að markmiði að auka virka samkeppni á raforkumarkaði fyrir neytendur," segir í umsögninni.

Enn fremur bendir talsmaður neytenda á að tillagan sé illsamræmanleg meginforsendu laga um skattskyldu orkufyrirtækja þar sem einnig var vitnað til samkeppnissjónarmiða í greinargerð með frumvarpi til þeirra laga. Í þriðja lagi telji hann að nýleg hlutafélagsvæðing Rarik hafi verið gerð í því skyni að skapa skilyrði virkrar samkeppni - neytendum til hagsbóta.

Með vísan til þess leggst talsmaður neytenda gegn því að færa Orkubú Vestfjarða og Rarik undir Landsvirkjun og leggur til að í staðinn verði stigin nauðsynleg skref til þess að gera forsendur samkeppni á neytendamarkaði fyrir raforku raunverulegar og virkja krafta samkeppninnar.

„Þar sem ég tel það ekki hlutverk talsmanns neytenda að hafa skoðun á því hvert eignarhald fyrirtækja á markaði skuli vera tel ég að öðrum kosti koma til álita sem illskárri kost að horfið verði frá yfirlýstri markaðsvæðingu raforkumarkaðar og komið á opinberri verðstýringu á markaði með þá grundvallarvöru sem raforka er. Tel ég ósk ríkisins af því að halda utan um „hagsmuni sína í rekstri raforkufyrirtækja með þessum hætti" eins og æskilegt er talið í almennum athugasemdum í greinargerð með frumvarpinu verða að víkja fyrir hagsmunum og réttindum neytenda af virkri samkeppni á sviði raforkumarkaðar," segir að endingu í umsögn talsmanns neytenda.