Uppsagnir í kauphöllinni í New York

Kauphöllin í New York (NYSE) í Bandaríkjunum ætlar að segja upp 17 prósentum af starfsmönnum fyrirtækisins eða um 500 manns. Þetta eru einhverjar viðamestu uppsagnir innan fyrirtækisins síðan árið 1991. Ástæðan er aukin sjálfvirkni í kjölfar yfirtöku NYSE á rafræna hlutabréfamarkaðnum Archipelago Holdings Inc.

NYSE hefur sagt upp samtals 950 manns eða um 35 prósentum af starfsliði markaðarins frá því rekstur Archipelago var keyptur í mars á þessu ári.

Að sögn greiningaraðila er þetta í samræmi við stefnu Johns Thain, forstjóra NYSE, sem hefur lofað hluthöfum að hann muni spara um 200 milljónir bandaríkjadala, jafnvirði 13,6 milljarða íslenskra króna, með ýmsum aðhaldsaðgerðum.