Gæti kostað sex milljarða í fyrstu

Flugmálastjórn Keflavíkurflugvallar tekur við slökkviliði og öðru sem snýr að rekstri flugvallarins þegar Bandaríkjaher heldur héðan á brott. Lagafrumvarp utanríkisráðherra í þessa veru var lagt fram á Alþingi í gærkvöldi. Þar segir að flugmálastjórnin annist stjórnun, rekstur og uppbyggingu Keflavíkurflugvallar - og er þá einkum horft til slökkviliðsins og snjóruðnings- og brautadeildar.

Það verður ekki ódýrt að taka við rekstri slökkviliðsins. Samkvæmt útreikningum fjármálaráðuneytisins kostar rekstur þess 1.400 milljónir króna á ári. En fyrst þarf að búa það tækjum. Kostnaður við það er óljós en fasteignir og tækjabúnaður slökkviliðs varnarliðsins er metinn á 4,3 milljarða króna.

Ekki hefur verið gengið frá því hvernig tækjabúnaði slökkviliðsins verður háttað. Slökkvibúnaður og annar sérhannaður tækjabúnaður verður ekki keyptur út úr búð, eins og einn viðmælandi orðaði það, og því er líklegasta niðurstaðan sú að slökkviliðið yfirtaki búnað Bandaríkjahers, í það minnsta fyrst um sinn.

Miklar breytingar verða á starfsemi Flugmálastjórnar Keflavíkurflugvallar. Þess sér meðal annars stað í starfsmannahaldi. Starfsmenn eru nú 62 talsins en viðbúið er að þeir verði um 200 þegar rekstur slökkviliðsins bætist við.

Bjóða á öllum starfsmönnum varnarliðsins sem unnið hafa við rekstur flugvallarins vinnu eftir því sem því verður við komið. Þar er um að ræða starfsmenn slökkviliðsins, snjóruðnings- og brautadeildar, rafeindadeildar, voltadeildar og verkfræðideildar.

Björn Ingi Knútsson flugvallarstjóri fagnar því að nú skýrist hvernig málum verður háttað. Björn Ingi segir að nú skapist festa fyrir það fólk sem hefur unnið þessi störf og hann hyggst funda með starfsfólki á næstu dögum.

Ný flugsveit tekur við loftvörnum Íslands í vikunni. Venjan er að sveitir bandaríska flughersins skiptist á um að sjá varnarliðinu fyrir þotum og eru hér tvo til þrjá mánuði í senn. Því má gera ráð fyrir að hér verði loftvarnir alla vega í tvo eða þrjá mánuði enn.