Býst við fjörugum umræðum á launamálaráðstefnu

Formaður launanefndar sveitarfélaganna segir miklar væntingar til launamálaráðstefnu sem haldin verið næsta föstudag en að þau deilumál sem uppi eru í kjaramálum verði ekki leyst strax þann dag. Hann býst við fjörugum umræðum á ráðstefnunni þar sem fjárhagsleg staða sveitarfélaganna sé mjög mismunandi.

Launanefnd sveitarfélaga, sem fer með umboð sveitarfélaganna í kjaraviðræðum, boðaði í síðasta mánuði til launamálaráðstefnu. Kveikjan að ráðstefnunni voru samningar Reykjavíkurborgar við Eflingu og Starfsmannafélag borgarinnar, en bæði leikskólakennarar og almennir starfsmenn annarra sveitarfélaga vilja að kjör sín verði leiðrétt til samræmis við þá. Seturétt á fundinum eiga fulltrúar allra sveitarfélaga í landinu og formaður Launanefndarinnar, Gunnar Rafn Sigurbjörnsson,sem undirbýr ráðstefnuna býst við fjörgum umræðum.Það séu mismunandi viðhorf til þess hvernig bregðast eigi við ástandinu. Sum sveitarfélögin eigi fullt í fangi með að standast þær kröfur sem til þeirra séu gerðar og margir sveitarstjórnarmenn muni eflaust segja að ekki sé hægt að auka útgjöld.

Gunnar bendir á að málið verði ekki leyst í eftirmiðdaginn 20. janúar. Væntingarnar til ráðstefnunnar séu miklar en málið sé umfangsmeira og flóknara en svo.

Hann telur að samkeppni milli sveitarfélaganna bjargi ekki málunum. Samkeppnin yrði ekki eingöngu milli sveitarfélaga heldur milli sveitarfélaga og hins almenna markaðar. Hann sé ekki viss um að allir séu sammála um að sveitarfélögin leiði launaþróunina í landinu. Hann spyr sig hvort nota eigi skattfé til að yfirbjóða markaðinn.

Gunnar segir að það sé sveitarfélaganna að koma með ábendingar að lausnum en Launanefndarinnar að útfæra þær og hann býst ekki við að það taki langan tíma að vinna úr þeim hugmyndum sem koma frá sveitarstjórnarmönnum. Hann sé ekki að tala um vikur eða mánuði heldur tiltölulega skamman tíma. Launanefndin hafi fylgst með því ástandi sem verið hafi í kjara- og launamálum og nefndin geti verið fljót að vinna úr niðurstöðum ráðstefnunnar.