Búið að hækka í græjunum

Það er alveg ljóst að partíið er komið í fullan gang aftur. Búið að hækka í græjunum og allir komnir út á gólf að dansa.

Löggan kom í líki erlendra bankagreinenda og skipaði mönnum að lækka í græjunum. Ekki var vitað til þess að neinn nágrannanna hefði kvartað, enda sjálfir allir í partíinu. Helst var að einn svefnstyggur í Hádegismóum hefði getað hafa tekið undir kvartanirnar. Annars eru allir í stuði.

Nú er sem sagt búið að hækka aftur og ég græði sem aldrei fyrr. Það er í raun ótrúlegt að ekki fleiri skuli spila á það sem auljóslega mun gerast. Tökum tvö góð dæmi af gróða mínum þessa vikuna. Ég sneri við öllum vösum og stillti mér upp í þremur félögum. Kaupþingi, FL group og Glitni. Ástæðan er augljós. FL og Glitnir voru í þann veginn að klára söluna á Icelandair. Það vissu allir að það var bara daga­spursmál. Buy on rumor sell on news virkaði sem aldrei fyrr.

Hitt er segin saga. Íslendingar lækka aldrei verð á hlutabréfum til samræmis við arðgreiðslur. Ég hefi í mörg ár tekið stóra stöðu í Glitni, hirt arðinn og selt. Þetta hefur alltaf skilað skammtímahagnaði. Auðvitað gerði maður eins með Kaupþing nú og BINGÓ. Kaupþing lækkaði ekki til samræmis við arðgreiðslurnar. Svo fékk maður hækkun á þeim í vikunni í bónus. Ekki slæmt það og ég keypti mér nýtt sjónvarp. Það var að koma ný kynslóð af flatskjám.

Þegar maður er svona ríkur ber manni viss skylda til að snúa gangverki efnahagslífsins með því að eyða peningum. Ég gef líka í góð málefni og svo hef ég verið duglegur að kaupa list að undanförnu. Maður vill jú láta gott af sér leiða í samfélaginu.

Annars lítur þetta allt ljómandi vel út. Hagnaðurinn streymir inn í fyrirtækin. Erlendu lánin á móti hlutabréfunum rýrna og mismunurinn er hreinn hagnaður. Í ljósi reynslunnar fylgist maður stíft með gjaldeyrismarkaðnum, en hann er eins og ég hef margoft sagt sá markaður sem fær blóðið í manni til að renna. Þeir sem fyrstir fatta hræringarnar þar eru þeir sem alltaf koma fyrstir í mark og þar er maður vanur að vera.

Spákaupmaðurinn á horninu