Landsfundur hefst á morgun

Framtíð Reykjavíkurflugvallar og málefni aldraðra verða líklega helstu átakamálin á þrítugasta og sjötta landsfundi Sjálfstæðisflokksins, sem hefst á morgun. Sem kunnugt er verður nýr formaður kosinn á fundinum sem og varaformaður. Þegar er búið að leggja fram drög að ályktunum í einum tuttugu og fjórum málaflokkum Flestar eru ályktanirnar hóflega orðaðar, eins og venja er og í mörgum tilvikum ólíklegt að mikil átök verði innan einstakra málefnahópa. Heimildarmenn fréttastofu innan raða sjálfstæðisflokksins eru sammála um að framtíð Reykjavíkurflugvallar komi til með að verða eitt helsta átakamálið. Í drögum að ályktun þar að lútandi segir að "Í ljósi mikillar umræðu um framtíð Vatnsmýrarsvæðisins álykti landsfundur að gerð verði flugtæknileg, fjárhagsleg og hagsmunaleg úttekt á því að byggja upp flugvöll í stað núverandi Reykjavíkurflugvallar sem sátt gæti náðst um á landsvísu." En þar er jafnframt nánast tekið fyrir þann möguleika að innanlandsflugið flytjist til Keflavíkur, þar sem það kippi rekstarlegum forsendum undan því. Stutt er í að kosið verði á lista Sjálfstæðismanna í borginni og ljóst að þeir sem þar eru í framboði vilja koma sjónarmiðum sínum á framfæri. Reikna má með að þau sjónarmið stangist verulega á við hugmyndir þingmanna landsbyggðarinnar um innanlandsflugið. Annað sem viðmælendur fréttastofu telja að verði í brennidepli eru málefni aldraðra. Í þeim drögum sem nú liggja fyrir um málefni eldri borgara er sérstök áhersla lögð á að samþykkt verði að allir sem náð hafi eftirlaunaaldri njóti lífeyris og tengdum bótum almannatrygginga án tillits til greiðslna úr lífeyrissjóðum. Þá sé það brýnt að hjón og sambýlisfólk njóti fullra lífeyrisgreiðslna án tillits til tekna maka. Ekki er búist við að mikið fari fyrir umræðum um Evrópusambandið á landsfundinum, jafnvel þó að Davíð Oddsson sé að láta af embætti og umræða um upptöku evrunnar hafi verið hávær upp á síðkastið. >