Geti kennt sjálfum sér um að vera lítið á sviðinu

Andstæðingar Sjálfstæðisflokksins í borginni hafa lítið verið á sviðinu og það er þeim sjálfum að kenna, segir Vilhjálmur Þ. Vilhjálmsson, oddviti sjálfstæðismanna í borgarstjórn, en ný skoðanakönnun sýnir að fylgi flokksins í borginni mælist nú 55,7 prósent. Borgarstjóri á von á að kannanir í febrúar gefi skýrari mynd af stöðu floikkanna.

Í nýrri skoðanakönnum sem Gallup gerði fyrir Björn Inga Hrafnsson, sem sækist eftir því að leiða Framsóknarflokkinn í komandi borgarstjórnarkosningum, kemur fram að Sjálfstæðisflokkurinn nýtur yfirburðafylgis í borginni og næði meirihluta ef kosið yrði nú. Samfylkingin reynist varla hálfdrættingur á við flokkinn en hún fengi 25,3 prósent. Þá fengju vinstri - grænir 12,3 prósent og Framsóknarflokkurinn 4,8 prósent og næði ekki inn manni frekar en frjálslyndir.

Vilhjálmur Þ. Vilhjálmssonm, oddviti sjálfstæðismanna, er þakkklátur fyrir stuðninginn. Hann endurspegli stuðning við störf sjálfstæðismanna í borgarstjórn og mjög ríka ósk borgarbúa um breytingar á stjórn borgarinnar.

Steinunn Valdís Óskarsdóttir borgarstjóri segir tölurnar ekki nógu góðar fyrir Samfylkinguna en hún á von á breytingu innan tveggja mánaða. Hún telur að mikið fylgi við Sjálfstæðisflokkinn endurspegli að einhverju leyti prófkjörið og alla þá umræðu sem hafi verið í kringum flokkinn. Önnur framboð séu að koma fram eitt af öðru, Framsóknarflokkurinn og Samfylkingin verði með prófkjör fljótlega.

Vilhjálmur segir anstæðinga Sjálfstæðisflokksins lítið vera á sviðinu og það sé þeim sjálfum að kenna. Þeir hafi skapað það tómarúm sem Dagur B. Eggertsson tali um.

Dagur B. Eggertsson tilkynnti í gær að hann hygðist taka þátt í slagnum um fyrsta sætið í prófkjöri Samfylkingarinnar fyrir borgarstjórnarkosningarnar. Steinunni líst vel á takast á við hann. Þau hafi þekkst lengi og séu gamlir samherjar úr sigurliði Röskvu úr Háskóla Íslands. Hún hlakki til og hver svo sem niðurstaðan verði verði engir eftirmálar af því.