Hyggjast lækka fasteignaskatta og holræsagjöld

Fasteignaskattur og holræsagjöld í Reykjavík verða lækkuð samkvæmt frumvarpi að fjárhagsáætlun Reykjavíkurborgar fyrir næsta ár. Hreinar skuldir borgarsjóðs eiga samt að lækka um fimmtung og rekstrarafgangur að verða 1,4 milljarðar króna.

Samkvæmt frumvarpi að fjárhagsáætlun sem borgarstjóri mælir fyrir á morgun, verður holræsagjald lækkað vegna hagræðingar af sameiningu Fráveitunnar og Orkuveitu Reykjavíkur og fasteignaskattur mun lækka, svo tekjur af honum standi í stað þrátt fyrir mun hærra fasteignamat. Hreinar skuldir borgarsjóðs lækka samt um1,1 milljarð króna.

En hvernig er hægt að lækka gjöld og þar með tekjur og skuldir samtímis? Steinunn Valdís Óskarsdóttir borgarstjóri segir að það sé einfaldlega styrk stjórn fjármála í borginni sem geri þetta kleift. Gert sér ráð fyrir að lækka holræsagjald á næsta ári og halda fasteignasköttum óbreyttum og þá séu gjöld tiltölulega lág. Á móti komi að tekjur séu innheimtar í gegnum hámarksútsvarsprósentu og það hafi einfaldlega verið pólitík meirihlutans að halda gjöldum í lágmarki en taka tekjur inn í gegnum sameiginlega sjóði.

Ef fyrirtæki borgarinnar eru tekin með í reikninginn þá aukast hreinar skuldir um rúma tíu milljarða króna og verða þær samtals 73,5 milljarðar í lok næsta árs. Á móti koma þó eignir upp á rúma 230 milljarða.

Steinunn segir ekki gert ráð fyrir sölu á hlut Reykjavíkurborgar í Landsvirkjun þar sem æði langvinnar samningaviðræður standi enn yfir og ekki útséð með niðurstöðu þeirra.

Í frumvarpinu er einnig gert ráð fyrir að leikskólinn verði gjaldfrjáls á sama tíma og það vantar tugi leikskólakennara og ekki er hægt að halda úti fullri þjónustu á leikskólum borgarinnar. Því er kannski ekki nema von að spurt sé hvernig þetta tvennt geti farið saman.

Steinunn segir að þetta sé viðfangsefni sem þurfi að skoða í samhengi og borgaryfirböld séu á ákveðinni braut í launamálum. Það sé hins vegar prinsippmál að verða með gjaldfrjálsa leikskóla og hún telji að það eigi að vera mannréttindi allra barna að fá að ganga í gjaldfrjálsan leikskóla.

Aðspurð hvort þjónustan þurfi ekki að vera til staðar áður en hægt sé að veita hana ókeypis segir Steinunn að þjónusta Leikskóla Reykjavíkur sé mjög góð og það sé almenn ánægja með hana en í augnablikinu sé það mikil þensla í efnahagslífinu að það sé skortur á vinnuafli, ekki bara hjá borginni heldur öðrum sveitarfélögum, ríkinu og á hinum almenna markaði.