Óviðunandi munur á mati stofnana

Lögboðið verðbólgumarkmið Seðlabankans næst ekki fyrr en eftir fjögur ár að mati fjármálaráðuneytisins. Edda Rós Karlsdóttir, forstöðumaður greiningardeildar Landsbankans, segir óviðunandi hve miklu muni á mati Seðlabankans og fjármálaráðuneytisins á þenslu í hagkerfinu. Fjármálaráðuneytið og Seðlabankinn hafa nýlega birt efnahagsspár sínar. Seðlabankinn með útgáfu Peningamála nú í lok september. Fjármálaráðuneytið með þjóðhagsspá sem gefin er út í tengslum við fjárlagafrumvarpið. Þar kveður við mismunandi tón. Fjármálaráðuneytið hefur ekki trú á því að verðbólgumarkmið Seðlabankans náist fyrr en árið 2009 samkvæmt nýrri þjóðhagsspá. Að sama skapi telur Seðlabankinn mun meiri framleiðsluspennu, sem er mælikvarði á undirliggjandi verðbólguþrýsting, heldur en fjármálaráðuneytið. Telja sérfræðingar ráðuneytisins að spennan sé ívið minni en í kringum aldamótin síðustu meðan Seðlabankinn segir að hún sé í sögulegu hámarki og hafi ekki verið meiri frá lokum níunda áratugarins, gangi spáin eftir. Edda Rós Karlsdóttir, forstöðumaður greiningardeildar Landsbankans, segir um aðferðarfræðimun að ræða sem hafi verið á milli stofnananna í dálítinn tíma. Hann hafi þó aldrei komið eins skýrt fram og nú. Edda segi í raun óásættanlegt að þessir tveir hagstjórnendur, ríkið og Seðlabankinn, skuli fá svo ólíka niðurstöðu sem valdi því að menn geti talað í kross.  Einhverjum gæti dottið í hug að fjármálaráðuneytið væri að reyna að fegra myndina og eins að verðbólgumarkmið Seðlabankans sé óraunhæft. Edda Rós segist ekki vilja taka undir neitt slíkt. Hins vegar virki væntingar um verðbólgu hvetjandi á verðbólgu og þess vegna torveldi það hagstjórn að þessir aðilar vinni ekki saman. Ef ríkisstjórnin hafi ekki trú á því að verðbólgumarkmið Seðlabankans náist komi það til með að hafa áhrif á launakröfur sem og verðlagningu í verslunum. Þegar menn geri áætlanir fram í tímann horfi þeir gjarnan á slíkar spár. Edda Rós segir enn fremur að ef hún væri að gera kröfu um laun myndi hún krefjast að minnsta kosti hækkunar sem nemur veerðbólgunni. Henni þyki annað ólíklegt.