Fyrirtækin eru að fjölga fólki

"Ég er ekki að segja að skortur sé á sérfræðingum í áðurnefndar greinar en flestar óskir sem koma inn á borð hjá okkur eru um starfsfólk með þennan bakgrunn," segir Helga og telur sýnilegt að fyrirtæki séu að fjölga fólki. "Þegar jákvæðar efnahagsspár koma fram og bjartsýni fer vaxandi fer keðjan af stað," segir hún. Mannafl-Liðsauki sérhæfir sig í ráðningum háskólamenntaðra einstaklinga, millistjórnenda, stjórnenda og í sérhæfð skrifstofustörf og Helga segir mikinn fjölda einstaklinga á skrá hjá fyrirtækinu. "Það berast oft um 50 og allt upp í 300 umsóknir um hvert gott starf. En margir sækja um ný störf þótt þeir séu í vinnu, meðal annars til að fylgjast með. Það eru alltaf einhverjir sem vilja breyta til, sækja reynslu á ný mið og víkka sitt starfssvið, þannig að umsóknafjöldinn er mikill." Hún segir verkfræðinga ekki mikið sýnilega á atvinnumarkaðnum og heldur ekki lögfræðinga. "Það er eftirspurn eftir lögfræðingum. Við höfum verið að leita að þeim til starfa inn í stjórnsýslukerfið, til einkaaðila og inn á lögfræðistofur," upplýsir hún. Einnig segir hún bókara með góðan bakgrunn og mikla reynslu eftirsótta. "Stóru fyrirtækin sem eru komin í útrás og eru í Kauphöllinni verða til dæmis að uppfæra bókhaldið reglulega. Rekstrarform eru að breytast og kröfur að aukast um upplýsingaflæði. Það kallar á fleiri sérhæfða starfsmenn á skrifstofunni."