Konur yfirgefa Jafnaðarmenn

Konur eru yfir níutíu prósent þeirra kjósenda sem danski Jafnaðarmannnaflokkurinn hefur misst frá því að kosningabaráttan hófst fyrir tæpum hálfum mánuði. Innan flokksins eru uppi raddir um að formaðurinn, Mogens Lykketoft, hætti ef spár rætast um sögulega útreið flokksins í þingkosningum eftir tíu daga. Sighvatur Jónsson, fréttamaður Stöðvar 2 og Bylgjunnar, er í Danmörku. Í fréttum Stöðvar 2 í gærkvöldi var sagt frá skoðanakönnun sem sýnir að 8 prósent aðskilja tvo stærstu flokkana, Jafnaðarmannaflokkinn og hinn frjálslynda Venstre. Í morgun skrifar dagblaðið Berlingske Tidende um nýja Gallup-könnun þar sem kemur fram að jafnaðarmenn hafi misst 130.000 kjósendur frá upphafi baráttunnar um miðjan janúar og að 120.000 þeirra séu konur. Jyllands Posten hefur í morgun eftir fyrrverandi formanni flokksins, Svend Auken, að nauðsynlegt sé að skipta um aðferð. Hann var formaður til 1992, þá tók Poul Nyrup Rasmussen við og sat til 2002 þegar Mogens Lykketoft settist í formannsstólinn. Stjórnmálaskýrendur Berlingske Tidende segja að innan flokksins heyrist raddir um að Lykketoft hætti sem formaður gangi úrslitin eftir sem yrðu þau verstu fyrir flokkinn í 30 ár. Hefur blaðið eftir heimildarmönnum innan flokksins að nái jafnaðarmenn ekki 26 prósentum muni Lykketoft hætta strax eftir kosningarnar, annað hvort á sjálfa kosninganóttina eða á fundi með stjórn flokksins og nýkjörnum þingflokki nokkrum dögum síðar. Nái þeir 26-27 prósentum eru skiptar meiningar um hvað Lykketoft gerir. Nái hann hins vegar að snúa dæminu við á lokasprettinum gæti Lykketoft setið áfram og jafnvel reynt einu sinni enn við forsætisráðherraembættið sem fyrrverandi formaður, Poul Nyrup, gegndi einmitt frá 1993-2001. Til að reyna að bæta stöðuna gáfu jafnaðarmenn út kosningalag í gær sem nálgast má á heimasíðu flokksins. Þar stendur að lagið fjalli um þau gildi sem flokkurinn standi fyrir og viljann til að trúa á samvinnu og að deila með öðrum. Lagið heitir „Við erum ekki neitt, ef við höfum ekki hvert annað.“ Kaldhæðnislegur misskilningur getur þó orðið þegar fólk nær í lagið á heimasíðuna þar sem nafnið á hljóðskránni er stytt og þar stendur aðeins: „Við erum ekki neitt.“