Börnin óörugg og kvíðin

Heimili og skóli - landssamtök foreldra hvetja kennara og foreldra til að sýna börnunum, sem nú setjast aftur á skólabekk eftir erfitt og langt óvissutímabil, nærgætni og umhyggju. Mörg börn hafi verið óörugg og kvíðin undanfarið og séu það enn, meðal annars vegna óvissu um hvernig skólastarfið verði á næstu vikum og mánuðum. Samtökin hvetja alla kennara, skólastjórnendur og ráðamenn sveitarfélaga til þess að setja líðan barnanna í öndvegi. Því miður hafi kjaradeila sveitarfélaga og kennara bitnað á börnunum og eigi mörg enn um sárt að binda. Mikið uppbyggingarstarf sé framundan í grunnskólum landsins sem bæði kennarar og foreldrar þurfi að vinna að í sameiningu. Komið sé að því að taka höndum saman og bæta börnunum þann skaða sem verkfallið olli þeim.