Hvaða ráðherra kveður?

Staða Jóns Kristjánssonar innan ríkisstjórnarinnar þykir síst sterkari en Sivjar Friðleifsdóttur. Enn mega þau þó bíða þess að Halldór Ásgrímsson deili ákvörðun sinni því ólíklegt er að hún verði tilkynnt þennan mánuðinn.  Rétt rúmur mánuður er þar til Halldór Ásgrímsson tekur við lyklavöldum í stjórnarráðinu í skiptum fyrir umhverfisráðuneytið. Töluverðrar spennu gætir í Framsóknarflokknum og víðar um það hvaða ráðherra Framsóknar verði látinn kveðja ríkisstjórnina. Siv Friðleifsdóttir hefur þótt vera í erfiðri stöðu í ljósi þess að það er hennar ráðuneyti sem fer til Sjálfstæðisflokksins. Á móti er hins vegar á það bent að hún kemur úr stærsta kjördæmi Framsóknar, er ritari flokksins og með sterkt bakland í kvennahreyfingunni. Siv segir sjálf að endanleg ákvörðun hafi ekki verið tekin. Hún hefur alla tíð sagt að hún hafi ekki áhuga á að hætta sem ráðherra. Það segir reyndar enginn. Árni Magnússon þykir ósnertanlegur þótt hann sé glænýr og komi úr Reykjavík, líkt og formaðurinn. Tveir ráðherrar Framsóknar koma úr Norðausturkjördæmi, Valgerður Sverrisdóttir og Jón Kristjánsson. Staða Valgerðar þykir sterkari en Jóns. Jón sagði í samtali við fréttastofu að hann vildi vera áfram ráðherra. Hann sé búinn að taka áttir í heilbrigðisráðuneytinu og telji sig geta gert þar gagn. Hann muni hins vegar bíða þess sem verða vilji. Sú ákveðna auðmýkt sem birtist í þessu svari er einmitt talin geta orðið honum að falli. Ljóst er að Framsóknarflokkurinn má ekki við fleiri þingmönnum sem fylgja frekar eigin skoðunum en flokksforystunnar. Jóni Kristjánssyni hefur hins vegar tekist hið ómögulega - það er, að vera svo gott sem óumdeildur ráðherra í fjárfrekasta ráðuneytinu. Ákvörðunar Halldórs Ásgrímssonar er ekki að vænta fyrr en stuttu fyrir skiptin 15. september - hvað sem hann ákveður verður umdeilt og hví leyfa óánægju að krauma? Þá þykir ekki góð reynsla af því að láta ráðherra sitja áfram þegar búið er að taka undan þeim stólinn.