Allsherjarnefnd fundar kl. 9:30

Allsherjarnefnd Alþingis kemur saman klukkan hálf tíu í dag og heldur áfram umfjöllun um fjölmiðlafrumvarpið. Lögfróðir menn sem komið hafa á fundi nefndarinnar til þessa hafa verið afar ósammála um hvort ríkisstjórninni sé heimilt, samkvæmt stjórnarskrá, að leggja fram nýtt fjölmiðlafrumvarp um leið og fjölmiðlalögin sem forseti Íslands vísaði til þjóðarinnar eru felld úr gildi. Sigurður Líndal, fyrrverandi lagaprófessor, telur slíkt brjóta í bága við stjórnarskrá. Jón Steinar Gunnlaugsson lagaprófessor er því ósammála og telur að Alþingi sé ávallt heimilt að setja ný lög. Sigurður Líndal segir að hafa verði í huga þegar lögfræðingar gefa ólík álit að margir þeirra vinni fyrir ríkisvaldið og að skoða verði álit þeirra í því ljósi.