Cloé Lacasse ekki valin í íslenska landsliðið en sextán ára markvörður er í hópnum

Jón Þór Hauksson, þjálfari íslenska kvennalandsliðsins í fótbolta, hefur valið leikmannhóp sinn fyrir fyrstu tvo leiki liðsins í undankeppni EM 2021.

Jón Þór gerði grein fyrir vali sínu á blaðamannafundi í höfuðstöðvum Sýnar í dag. Þetta er fyrstu keppnisleikir íslensku stelpnanna síðan að Jón Þór tók við liðinu af Frey Alexanderssyni.

Leikirnir fara fram á Laugardalsvelli í lok ágúst og byrjun september en þeir eru gegn Ungverjalandi og Slóvakíu í undankeppni EM 2021.

Jón Þór Hauksson hefur stýrt íslenska liðinu í átta æfingaleikjum í ár þar af þremur þeirra á Algarve-mótinu en nú er komið að fyrsta alvöru prófinu.

Cloé Lacasse er komin með íslenskt ríkisfang en hún var ekki valinn í hópinn að þessu sinni. Cloé Lacasse skoraði 11 mörk í 12 leikjum með ÍBV í Pepsi Max deild kvenna í sumar áður en hún yfirgaf Eyjarnar og samdi við portúgalska félagið Benfica.

Í hópnum er aftur á móti Cecilía Rán Rúnarsdóttir frá Fylki en hún er nýbúin að halda upp á sextán ára afmælið sitt. Cecilía Rán er eini nýliðinn í landsliðshópnum að þessu sinni.

Jón Þór gerir tvær breytingar á hópnum. Cecilía Rán Rúnarsdóttir kemur inn fyrir Guðbjörgu Gunnarsdóttur sem er ólétt og Svava Rós Guðmundsdóttir kemur inn fyrir Söndru Maríu Jessen.

Reynsluboltinn Margrét Lára Viðarsdóttir er í landsliðshópnum og hún var ein af sjö Valskonum sem voru valdar. Breiðablik er líka með sjö leikmenn í hópnum.



Hópurinn fyrir leikina á móti Ungverjalandi og Slóvakíu:

Sandra Sigurðardóttir | Valur

Sonný Lára Þráinsdóttir | Breiðablik

Cecilía Rán Rúnarsdóttir | Fylkir

Ásta Eir Árnadóttir | Breiðablik

Ingibjörg Sigurðardóttir | Djurgarden

Sif Atladóttir | Kristianstads DFF

Guðný Árnadóttir | Valur

Anna Björk Kristjánsdóttir | PSV

Glódís Perla Viggósdóttir | Rosengard

Áslaug Munda Gunnlaugsdóttir | Breiðablik

Hallbera Guðný Gísladóttir | Valur

Dagný Brynjarsdóttir | Portland Thorns

Margrét Lára Viðarsdóttir | Valur

Karólína Lea Vilhjálmsdóttir | Breiðablik

Gunnhildur Yrsa Jónsdóttir | Utah Royals

Sara Björk Gunnarsdóttir | Wolfsburg

Alexandra Jóhannsdóttir | Breiðablik

Hlín Eiríksdóttir | Valur

Agla María Albertsdóttir | Breiðablik

Berglind Björg Þorvaldsdóttir | Breiðablik

Elín Metta Jensen | Valur

Svava Rós Guðmundsdóttir | Kristianstads DFF

Fanndís Friðriksdóttir | Valur